చిలుక ఆచూకి చెప్పిన వారికి రూ.10వేలు బహుమతి

పెంపుడు జంతువులు, పక్షులతో తమకున్న అనుబంధానికి సంబంధించిన వీడియోలను ఇటీవలి కాలంలో కొంతమంది సోషల్ మీడియాలో పంచుకోవడం చూస్తున్నాం. మధ్యప్రదేశ్‌లోని దమోహ్‌ జిల్లాకు చెందిన దీపక్‌ సోనీ కుటుంబం కథ వేరు. వీరి పెంపుడు చిలుక ఎటో ఎగిరిపోయింది.

ఆ చిలుక ఫొటోలతో పోస్టర్లు వేసి ఆచూకీ చెప్పినవారికి రూ.10 వేలు రివార్డు ఇస్తామని ప్రకటించారు. ఊరంతా పోస్టర్లు వేసి, ఆటోకు మైకులు పెట్టి మరీ ఈ విషయం ప్రచారం చేస్తున్నారు. నిజానికి చిలుక ఇలా పారిపోవడం ఇదేమీ తొలిసారి కాదు. కానీ.. ఆ చిలుకపై ఉన్న ప్రేమతో దాని యజమాని మళ్లీ తిరిగిరావాలని వెంపర్లాడుతున్నాడు.

‘గత నెలలో ఒకసారి ఇలాగే ఎగిరిపోయి మళ్లీ దానంతటదే ఇంటికి తిరిగొచ్చింది. ఇప్పుడు మళ్లీ ఎగిరిపోయింది. ఇప్పటిదాకా రాలేదు. అది సరిగా ఎగరలేకపోతోంది. వీధికుక్కలు ఏమైనా హాని చేశాయేమోనని భయపడుతున్నాం. ఆ చిలుక అంటే మా కుటుంబానికి ఎంతో ఇష్టం’’ అని దీపక్‌ సోనీ ఆవేదన వ్యక్తం చేశారు. ఈ చిలుక పోస్టర్లు వైరల్‌గా మారాయి.