మావోయిస్టుల ఆయుధ డంప్‌ స్వాధీనం

. ఒడిశాలోని మల్కన్‌గిరి జిల్లాలో లభ్యం

భువనేశ్వర్‌, న్యూస్‌లీడర్‌, ఆగస్టు 8: డిశాలోని మల్కన్‌గిరి జిల్లాలో బీఎస్‌ఎఫ్‌ బెటాలియన్‌ సిబ్బంది నిర్వహించిన సోదాల్లో మావోయిస్టుల భారీ ఆయుధ సామాగ్రి లభ్యమైంది. పక్క సమాచారంతో జరిపిన సోదాల్లో లభ్యమైన ఈ సామాగ్రి మొత్తాన్ని సరిహద్దు భద్రతా దళాలు స్వాధీనం చేసుకున్నాయి. బెజంగివడ రిజర్వ్‌ ఫారెస్ట్‌లో మావోయిస్టుల కదలికలపై పక్కా సమాచారం అందడంతో మల్కన్‌గిరి జిల్లాలో బెటాలియన్‌ సిబ్బంది సోమవారం సెర్చ్‌ ఆపరేషన్‌ నిర్వహించింది. ఇందులో భాగంగా మల్కన్‌గిరి జిల్లాలోని కలిమెల పోలీస్‌ పరిధి అమపాదర్‌-ఎల్కనూర్‌ గ్రామం, బోడిలుగూడ- బృందమామిడి సమీపంలోని రిజర్వ్‌ ఫారెస్ట్‌లో జరిపిన సోదాల్లో రాకెట్‌ లాంచర్‌లతో సహా భారీ ఆయుధాలు, మందుగుండు సామగ్రిని స్వాధీనం చేసుకున్నారు. సరిహద్దు భద్రతా దళాల వారు స్వాధీనం చేసుకున్న ఆయుధాల్లో ఒక 303 రైఫిల్‌, 11 బ్యారెల్‌ ,(ఎస్‌బీఎంఎల్‌) 03 రైఫిల్‌ మ్యాగజైన్‌, 15 మెరుగైన హ్యాండ్‌ గ్రెనేడ్‌లు, మూడు దేశీయ తుపాకులు, రెండు 51 (ఎంఎం) మోర్టార్‌ బాంబులు, ఒక గ్యాస్‌ వెల్డింగ్‌ యంత్రం, 42 లైవ్‌ కాట్రిడ్జ్‌లు, రాకెట్‌ లాంచర్‌, రెండు బ్రెన్‌ 303 ఎల్‌ఎంజీ స్పేర్‌ బ్యారెల్స్‌, 29 జెలటిన్‌ స్టిక్స్‌, ఐదు అల్యూమినియం నైట్రేట్‌ ప్యాకెట్లు, 30 ఎలక్ట్రిక్‌ డిటోనేటర్లు, తొమ్మిది సింథటిక్‌ వెయిస్ట్‌ బెల్ట్‌లున్నాయి.
మావోయిస్టుల కంచుకోట ఇదీ…

ఒకప్పుడు ఈ ప్రాంతం మావోయిస్టులకు వారి సానుభూతిపరులకు కంచుకోటగా ఉండేదని, వామపక్ష దళాలు పేలుడు ముడి పదార్థాలను ఇటువంటి రిమోట్‌ ప్రదేశాలలో ఉంచి అవసరమైనప్పుడు వీటిని ఉపయోగిస్తూ ఉంటారని ఫోర్స్‌ సిబ్బంది తెలిపారు. ఒక్కసారిగా ఇంత పెద్ద మొత్తంలో ఆయుధ సామగ్రి దొరకడంతో మావోయిస్టుల ఉనికి నిర్ధారణ అయ్యిందని అనుమానిత ప్రాంతాల్లో కూడా సెర్చ్‌ ఆపరేషన్‌ నిర్వహించనున్నట్లు తెలిపారు.