ఈరోజే నాలుగో టీ20.. భారత్ ఓడితే సిరీస్ గల్లంతు

ఐదు టీ20ల సిరీస్‌లో 2-1తో విండీస్‌ జట్టు ఆధిక్యంలో ఉంది. ఈ సిరీస్‌ గెలిచేందుకు ఒక్క విజయం దూరంలో ఉంది. రెండూ మ్యాచ్‌లు ఓడిపోయి మరో ఓటమి ఎదురైతే సిరీస్ చేజారే పరిస్థితిలో పుంజుకున్న టీమిండియా.. మూడో టీ20లో గెలిచి హమ్మయ్య అనుకుంది. కానీ కథ అంతటితో ముగియలేదు. నాలుగో టీ20లో ఓడినా సిరీస్ చేజారిపోతుంది. ఈ నేపథ్యంలో శనివారం జరిగే నాలుగో మ్యాచ్‌లో భారత్, వెస్టిండీస్ అమీతుమీ తేల్చుకోనున్నాయి.

నాలుగో టీ20 మ్యాచ్‌ అమెరికాలోని ఫ్లోరిడాలో గల లాడర్‌హిల్‌ సిటీలో జరగనుంది. ఐదో టీ20 కూడా అక్కడే జరగనుంది. మూడో టీ20 విజయంతో ఆశలను సజీవం చేసుకున్న హార్దిక్ సేన.. నాలుగో టీ20లో కూడా విజయం సాధించాలనే పట్టుదలతో ఉంది. మరి చివరి 2 టీ20ల కోసం అమెరికాలో అడుగుపెట్టిన భారత్‌ ఫలితం రాబడుతుందో వేచి చూడాల్సిందే.

ఈ టూర్‌లో ఇప్పటి వరకు జరిగిన అన్ని మ్యాచ్‌లతో పోలిస్తే అమెరికాలోని ఈ రీజినల్‌ పార్క్‌ స్టేడియం బ్యాటింగ్‌కు బాగా అనుకూలించే మైదానం. అయితే బ్యాటింగ్‌కు బాగా అనుకూలించే లాడర్‌హిల్‌ పిచ్‌పై విండీస్‌ విధ్వంసక వీరులను ఆపి సిరీస్‌ సాధించడం అంత తేలిక కాదు.