ప్రేమించిన పాపానికి నరికి చంపిన అన్నదమ్ముళ్లు

వేరే కులం వ్యక్తిని ప్రేమించిందన్న కారణంతో తోడబుట్టిన సోదరిని ఇద్దరు సోదరులు అతి కిరాతకంగా గొడ్డలితో నరికి చంపారు. భయంతో దాక్కున్నా.. వెతికి మరీ హతమార్చారు. మానవత్వానికే మచ్చతెచ్చే ఈ ఘటన మహారాష్ట్రలోని ఛత్రపతి శంభాజీనగర్‌ జిల్లాలో జరిగింది.

పోలీసులు తెలిపిన వివరాల ప్రకారం.. సోయగావ్‌ పోలీస్‌ స్టేషన్‌ పరిధిలోని ఓ గ్రామంలో మాయత్‌ చంద్రకళ అనే యువతి వేరే కులానికి చెందిన ఓ యువకుడిని ప్రేమించింది. దీన్ని ఆమె కుటుంబ సభ్యులు తీవ్రంగా వ్యతిరేకించారు. దీంతో ఆమె తాను ప్రేమించిన వ్యక్తితో అతడి ఇంట్లోనే సహజీవనం చేస్తోంది. ఈ విషయం తెలుసుకున్న యువతి ఇద్దరు సోదరులు.. ఆమెను చంపేందుకు గొడ్డళ్లతో బయలుదేరారు.

ఈ విషయం తెలిసిన యువతి.. ఓ వ్యక్తి సహాయంతో సమీపంలో ఉన్న మేకల కొట్టంలో దాక్కుంది. ఆగ్రహంతో ఊగిపోతున్న నిందితులు.. ఆమె కోసం వెతికారు. అనంతరం మేకల కొట్టంలో దాక్కున్న ఆమెను పట్టుకుని గొడ్డళ్లతో దారుణంగా నరికారు. తీవ్రంగా గాయపడ్డ యువతి రక్తపు మడుగులో కొట్టుకుంటూ మృతి చెందింది. బాధితురాలికి సహాయం చేసిన వ్యక్తిపై కూడా నిందితులు దాడి చేశారు. సమాచారం అందుకున్న పోలీసులు యువతి సోదరులతో పాటు ఆమె తల్లిదండ్రులపై కేసు నమోదు చేసి రిమాండ్‌కు తరలించారు.